بصوا بقى من الآخر و من غير كلام كتير كل واحد كده بعد مايخلص البوست ده ينزل لأقرب مكتبة بتبيع روايات
مصرية للجيب ويشتري الأعداد 45و46 من سلسلة قصص فانتازيا للرائع د/ أحمد خالد توفيق اللي هما (تشي)و( الحالم الأخير)بالترتيب..قصتين في منتهى الروعة ..الفكرة جديدة تماما..استنساخ تشي جيفارا وذهابه للمقاومة في العراق باعتبار أنها المكان الأمثل لمحاربةالأميريكيين..القصةماينفعش تتحكي ,تتقرا بس, الأسلوب في منتهى الروعة مع وقت مستقطع لقراءة بعض أبيات الرائع أحمد فؤاد نجم ,أول ماسمعت عنها كانت لما قريت مقال في جريدة الدستور والموضوع عجبني جدا وجبتها في الأجازة دي ولسا مخلص الجزء التاني امبارح..جميلة جميلة جميلة ..مش عايز اتكلم كتيير يلا انزلوا أما بالنسبة لصورة جيفارا المحطوطة في المدونة فدا مالوش علاقة لأني نفسي احطها من زمان لشدة إعجابي بهذا الرجل منذ زمن بعيد..دورت على جمال عبد الناصر بس ملقتلوش صورة بالعينين الحالمة دي 00الله يرحمه بقى 0
مش عايز حد يطلعلي دلوقتي ويقولي ايه فانتازيا دي ..مش حعتقوا بعد كده ..شكلي بقول الكلام ده كله وانتوا قريتوا القصة أصلا ..بس أديني عملت اللي عليا 00
مع تحياتي 00
والسلام عليكم0
هناك ١٩ تعليقًا:
اديني جتلك اهو يا مان و شد حيلك بقي عايزين نشوف مدونة جباره اوكي
و انا الصراحه مش متابعيين القصص يعني يمكن لاني مش جنبي اماكن اجيب منها بس انا ان شاء الله هكتب اسمها في ورقة و ادور عليها او ابقي قولي بتتباع فين لو انت من القاهره و شرفت مدونتي السلام ختام
أهلا بيك ياباشا نورت المدونة ..إن شاء الله جباااااااااااارة على رأي حليم ومفرقش بقى تأنيث ولا تذكير كلها صفات بصرحة أنا معرفش بتتباع فين في مصر أنا متأكد إنها بتتباع في الفجالة بس فين بالضبط مش عارف أصل أنا طنطاوي مش من القاهرة ..عموما لو جبت القصة حتة بس كده عشان تبقى فاهم يعني إن معظم القصة عبارة عن حلم مصطنع عن طريق برنامج كمبيوتر
بس بتخرج منه البطلة إذا شعرت بالخطر على حياتها 0نورت المدونة كمان مرة وأرجو المشاركة الفعالة 00
مع تحياتي 00
والسلام عليكم0
والله انتا بتفهم انا متابع لدكتور خالد من زمان ..بس معرفش انه فى اعداد جديدة نزلت بكرة ان شاء الله حنزل اجيبهم..واستمر فى التدوينات ننتظر جديدك
FEMTO:
نورت المدونة يا عزيزي 00متشكر على المدح الجميل ده ..ماشي ياباشا اقراهم وادعيلي ..في تدوينة قريب إن شاء الله
اتمنى تعجبكم0
مع تحياتي 00
والسلام عليكم0
نورت المدونة مرة تانية0
على فكرة أنا دخلت هنا و كنت فاكر إنها مدونة الواد أحمد المصرى صاحبى مطلعتش هيا بس الحمد للة أنا مش ندمان إنى دخلت هنا و بالنسبة للموضوع بتاع جيفارا إحنا عايزيين المقاومة تكون بصبغة عربية
KAED:
أشكر القدر السعيد الذي جمعني بك ..وأؤكد لك أن التحرك للنهضة فعلا
يجب أن يكون عربيا قويا ..أنا القصة
عجبتني عشان أسلوبها وتحليلها النفسي الرائع للشخصية ..وانا فعلا بعشق تحليل
الشخصيات المثيرة للجدل عبر التاريخ و
دراستها للخروج بوجهة نظر عنها يعني أنا يمكن بعشق عبد الناصر ومالكولم إكس وتشي جيفارا لكن اختلف معهم تمام الإختلاف في العديد من أساليبهم وأفكارهم إعجابي بيهم عشان كانوا رجالة ..وضعوا أمامهم هدفا قوميا وماتوا عشانه ..هوا ده العماد الأساسي المكون للرجولة الإيمان و التضحية بالنفس من أجل المبدأ-مع اختلافي في المبدا بعض الأحيان-لكن أنا بتكلم عن الفكرة البحتة واشمعنى تشي بقى يمكن عشان وسيم شوية قد يكون الكلام عبيط بس هوا ده الواقع00شكرا للمرور 00نورت المدونة 00وارجوا المشاركة الفعالة 0
مع تحياتي00
والسلام عليكم0
اشكرك علي زيارتك لمدونتي
انا قريت القصتين فعلا وهما حلوين اوي زي مانت بتقول..و بصراحة كده انا باحب اي حاجة يكتبها د.احمد خالد توفيق وانا شخصيا باعتبر ان هو اللي علم الجيل ده القراءة..
اشوفك علي خير في تدينات اخري
يامن :
شكرا على المرور الكريم ..بصراحة د/أحمد توفيق أنا ماقرتلوش كتير بس أنا اتجهتله ولعدد آخر من المؤلفين عشان قلت لازم أغير لأني أساسا بعشق نبيل فاروق وتقريبا مابقراش قصص لغيره فقلت لا ياعم أحمد لازم تنوع ..واشترين لكل كتاب المؤسسة العربية الحديثة تقريبا ..وعشقت كل كتابها خاصة د/نبيل ود/أحمد لأنهم فعلا رائعون بما تحمله الكلمة من معنى .آآه صحيح عايز اسألك سؤال ..هوا الجيل ده بيقرا أساسا ؟
مع تحياتي 00
والسلام عليكم0
اوعدك هجيبهم
انت كده بجد شوقتنى أجيب القصتين دول!! أنا مبفوتش عدد واحد من ما وراء الطبيعة وسافارى لكن فانتازيا اللى مش منتظمة فيها أوى
أحمد خالد توفيق طول عمره مبدع بجد
manal
على فكرة قريتها
وجامدة جداااااااا
SHARM:
هاتهم ياعم وابقى ادعيلي0
-------
ALBIDA:
أنا بقى مبحبش حاجة بيعملها اكتر من فانتازيا ..ودي أحسن قصة قريتهاله على الإطلاق00بس لو ماكانش فيها رخامة يعني هيا سافاري دي بتتكلم عن إيه؟
المهم هاتيهم واستمتعي0
-------
الوردة السودة:
شفتي بقى أحمد خالد ده راااائع00على فكرة مدونتك جامدة جدا 00شكرا على المرور لكم جميعا واتمنى تكرار الزيارة 0
مع تحياتي00
والسلام عليكم0
سافارى دى سلسلة بتحكى مغامرات دكتور شاب مصرى بيشتغل فى أفريقيا... بجد حلوة اوى واللى بيعجبنى فيها بجد هى المعلومات الطبية الكتيرة اللى بتبقى فيها
ليه مش بتجيب غير فانتازيا؟ ما وراء الطبيعة مش بتعجبك؟
manal
ممم شكلها حلوة فعلا ..ححاول اجيبها
ماوراء الطبيعة حلوة بس أنا بحس إنها ملهقاش قيمة أوي لإني مش بستفيد كتير من قصص الرعب ورغم ذلك بجيبها بس أنا بحب فانتازيا أكتر وإن شاء الله حجرب سافاري..هوا آخر جزء نزل منها إيه وهوا جزء لوحده ولا عدة أجزاء ..بمعنى آخر قصة نزلت كانت عبارة عن كتاب احد ولا عدة أجزاء؟شكرا على المعلومات0
مع تحياتي00
والسلام عليكم0
ايه ياعم احمد
كده هيبقي فيه لخبطة بيني وبينك
علشان صورة جيفارا
ياعم انا اقولك علي صورة جامدة
حط صورة ابو علاء
ايه رايك
اما بقي بالنسبة لقصص خالد توفيق
فانا امع احترامي لك
مش هاسيب هيكل
وانيس منصور
نجيب محفوظ
ونزار وجويدة
اقعد اقرا روايات خيالية
الاولي اني اعرف الواقع
سلام يا جيل
عمر:
ههههه..أبو علاء!!ميمون !!لا والله أنا
عايز المدونة نضيفة زي ماهيا مش عايز أوسخها00وحد قال حاجة ياباشا على أساتذة الجيل خاصة هيكل وأنا شخصيا كنت لسة من يومين حجيب أولاد حارتنا لمحفوظ لولا السيولة..30 جنيه ده افترى00بس حجيبها ساعة ماتتيسر ومفيش مانع إن احنا نعرف الخيال والواقع مع بعض ولو بطلنا نسرح-نتخيل يعني-نموت
هوا فيه أروع من أنيس وكتابتاه عن ماوراء الطبيعيات ..ولا مواقف
ولا في أجمل من مرثية حلم وعمي فرج لجويدة أو من بلقيس و خبز وحشيش وقمر لنزار أنا مش سايب الناس دي يعني بس أنا اتربيت على إيد روايات مصرية للجيب ..ومعتقدش إن فيها حاجة وحشة قصص فيها قدوة,متعة كل حاجة حلوة 00
و هذا لا يقلل من شأن العباقرة فلهم منازل أخرى لا استطيع أنا -قليل العلم والثقافة أن اتحدث عنها ربما لأنهم لا يحتاجون لذلك000شكرا على الزيارة الجميلة والرأي المهم ..ونرجو تكرارها00وعذرا للإطالة0
مع تحياتي00
والسلام عليكم0
أحييك يابو حميد على حماسك الجميل
وأوعدكأن شاء الله ان حقرا العددين من كتر ما شوقتينى ليهم
وأنتظر منى تغير الوصلة
الغريب
الغريب :
نورت المدونة..شكرا على التحية ..لما تقراهم ابقى قوللي رأيك0
مع تحياتي00
والسلام عليكم0
بس حد قراء اسطورة سالم و لمس الاخيرة
فى موراء الطبية ارجوا قرائتها عشان هى جمدة و تلمح على مصر و الاسبدات و كفي انتقل الى عالم مشابهة لقاهرة يحكموا طاغية
إرسال تعليق