لما كنت في النيابة

تم استدعائي عند وكيل النيابة في مدونة نور..المدونة المميزة جدا لسؤالي بعض الأسئلة الخاصة بآرائي الشخصية-قال يعني راجل مهم!!-وتم تسريب الأسئلة عن طريق بعض الأصدقاءالصحفيين 00
أحب شخص لقلبك في الدنيا؟

بصراحة ...مش عارف,يمكن مفيش يمكن فيه وانا مش واخد بالي..بس معرفش اكره حد لوقت طويل والحمد لله0

انسان مستعد تضحي بحياتك عشانه؟
أي بني آدم في الدنيا مادام في الجانب الصح..وإذا كان الموقف يستحق0

انسان كرهته لدرجة الجنون و تمنيت لو تمسك سكينة
وتنقض عليه وتغرزها فى قلبه تقتله وتقف تبص
لجثته وتشفي غليل قلبك؟
ده فيلم رعب بقى..بصراحة بتحصل كتير وساعات أكتر من مرة في اليوم بس بخزي الشيطان في الآخر وأقول بلاش انت ليه تضيع نفسك عشان تافهين زيه.. وزي ماقلت بحاول اتخلص من الكراهية بسرعة0

ما هو اسم اجمل كتاب كتبه بشر قراته ومحتفظ بيه حتي الان ؟
ج:انا بقالي ييجي سبع سنين بقرا..محسيتش إن فيه كتاب وصلت بيه للمنزلة دي يعني اه فيه حاجات بحبها أوي لكن لما اقرا حاجات تانية بعجب بيها برضه ..وانا بحتفظ بكل الكتب و مكتبتي مفتوحة للكل والحمد لله0

اسم كتاب -كتبه بشر برضة- انت متعلق بيه وبتقرأه كل فترة؟
ج:كتب كوكتيل لنبيل فاروق ..بحاول اجمع بعض المعلومات اللي قريتها قبل كده كل فترة0

جهاز منزلى انت متعلق بيه او بتستخدمه كتير؟
الكمبيوتر طبعا

مكان تحس بالراحة النفسية عندما تراه

الجامع من جوه

ان تحس فيه بالحنين الى شىء لا تدرى ماهو
و ذكريات جارفة الى شي؟

الشارع0

مكان تحس بالراحة عندما تدخله؟

الجامع برضه..انا مش متدين ولا حاجة بس قعدة الجامع بالدنيا..مريحة جدا0

اجمل مدينة زرتها داخل مصر؟
اسكندرية طبعا..بعشقها0

واجمل منظر طبيعي داخل مصر ؟
البحر الأحمر-البحر نفسه مش المحافظة-0

شخصية كارتونية بتحبها؟
انا عموما محبش ارتبط ببطل معين أو شخصية فنية معينة في أي حاجة بس ممكن تقول كوروساكي اتشيجو بطل مسلسل انيمي عرفني بيه صديقي المدون محمد المصري0

نوع هاتفك المحمول؟
عرض النجم..تسمع عنه؟

بالنسبة لسرعة بروسيسور الجهاز وحجم الهاردوحجم المواد الاسلامية والكلام دا؟
ااااااه جينا للأسئلة المحرجة..البروسيسور2.6 جيجا الهارد 120 جيجا المواد الإسلامية مش عارف بس مش كتير ومش شوية صغيرين0

أهم هدف انت واضعه لحياتك الآن؟
اكتب..مش عايز اكتر منن كده0

مواصفات فتاة الأحلام بالنسبة لك؟
محترمة-بما تحمله الكلمة من معنى-و هادية ومثقفة..وارتحلها..بس كده0

صف ما يأتى:شعورك لما بتسمع كلمة مصر ؟
فخر0

شعورك لما بتسمع كلام عن اليهود؟
حرقة دم تضاف إلى حرقة الدم اللي بعانيها كل شوية0

شعورك لما بتشوف ظابط شرطة؟
بيصعبوا عليا ..الكويس بيصعب عليا من صعوبة الشغل و الوحش بيصعب عليا من اللي حيشوفه يوم الحساب0

شعورك لما بتشوف الكناس العجوز فى الطريق؟
حب شديد ..بحب اسلم عليهم أوي0

افكارك تجاه شاب ماشى فى الطريق يلبس جلابية
بيضاء قصيرة وعمامة وله لحية وبجيبه السواك وبيده المصحف؟
شعور جميل يشوبه قلق ألا يكون بهذه الصورة فعلا من الداخل0
--------------------------------
التحقيق الأول خلص نيجي للأسئلة المسربة من التاني00

اسم مدونتك؟
كن رجلا..هوا مش واضح ولا ايه؟

لماذا اخترته..وماهي نيتك من وراء اختياره؟
سمعت المثل ده مرة من عمر خالد عجبني قلت اسمي المدونة على اسمه..بقتكر الكلمة دي كل يوم ألف مرة ومبعملش بيه..ازدواجية فكر!!0

هل فكرت في إغلاق مدونتك؟..والسبب؟
لا أبدا..فقط أفكر بين الحين والآخر بالتوقف عن الكتابة بعض الوقت لأعتزل الحياة قليلا -وهو ما أشعر به الآن-لكن لن أغلقها أبدا0

صورتك في المدونة..رمزيتها؟
مالكولم اكس من اكتر الشخصيات اللي أثرت في حياتي..قصته مؤثرة جدا..اعتقد إن ده لازم يبقى قدوة للمسلمين كمثال حديث للشرفاء0

لماذا دخلت عالم التدوين من الاساس؟
سمعت عنه قلت أجرب ..واهو بالمرة أحسن موهبتي في الكتابة بس لقيت نفسي دخلت العالم السحري الجميل..ما اعتقدش حسيبه0

احلى جمله قيلت لك فى وصف مدونتك؟
لا اعتقد أنها مدحت كثيرا..و إن مدحت فلا أذكر ما قيل بالضبط..بس فيه واحدة في منتدى قرت قصة من قصصي القصيرة عجبتها وقالت:الان الله لك الكلمات لتبدع دوما ساعتها حسيت إني مسئول أكتر من أي مرة0

التعليقات بالنسبه لك ..اهميتها؟
عداد نجاحي..بحب جدا أشوف تعليقات تنقض أسلوب كتابتي بس مبيجيليش كتير وده بيغيظني ,الموضوع مش بالكيلو ولا اجبار بس اهه الواحد بيقول اللي بيحس بيه بصراحة..ده تحقيق نيابة يا جماعة معرفش اكدب فيه0

مااحلى بوست كتبته ...ضع اللينك ..ثم اذكر لماذا؟
كله بالنسبة ليا جميل..بس أكتر حاجة عجبتني انا شخصيا وحسيت بنفسي فيها قصة جتك خيبة..اللينك اهه:http://b-aman.blogspot.com/2007/08/0_09.html

أحلى مدونة قريتها؟
مدونتي طبعا..عارف إن الموضوع فيه غرور ودي صفة متأصلة فيا ..لكن انا بتكلم جد أحسن حاجة بقراها في عيني حاجتي طبعا انا بعشق كل المدونين التانيين وبحترمهم جدا و في المنطقة الأدبية أحسن مدونين بقرالهم هاني جورج في بيكا روبابيكيا..هوا مبيجيش هنا -مش عارف ليه- ويا مراكبي .. بحبهم جدا0

أفضل بوست قرأته؟ وضع لينكه؟
كتييييييييييييير ..لا مجال للمفاضلة0

حد قل ادبه في التعليق؟عملت ايه؟
أسوأ مدونة؟ أسوأ بوست؟
بصراحة محصلش ولقيت تعليق قليل الأدب أو قريت مدونة وحشة0

ايه اللي حيصل لإيميلك لما تموت ؟
هيموت معايا بالتأكيد00يعني كان في حد بيبعتلي 00عموما انا عامله عشان المدونة بس0

اديت الباسوورد لحد قبل كده ؟
لأ طبعا 00أصل انا محبش حد يتدخل في خصوصياتي 0حتى لو كان الإيميل ملوش لازمة00طبعا الناس اللي حواليه كلهم بيستغربوا كده أصل مفيش في قاموس الشعب حاجة اسمها احترام الحرية الشخصية0

اسمك؟
ج:اظن واضح 00أحمد المصري,رغم إنه مش اسمي الحقيقي00بس كفاية عليكوا الإسم ده00هوا نهب ولا ايه!!0

اسم الدلع المشهور وسط أصحابي؟
مليش ومحبش يبقى ليه 00يمكن عشان اسمي (أحمد)ماينفعش يبقالوا دلع0

مجال دراستك؟
طب بشري -الفرقة التانية لما السنة تبتدي0

شخصيتك نوعها ايه؟
سؤال غريب ياجدع في حد برضه يوصف شخصيته؟ ..ماهو لو كل واحد عرف نفسه كويس ماكناش وصلنا للي احنا فيه..عموما ححاول: عصبي ,مستفز,بعشق الهدوء,فلفسي شوية في أفكاري ,كئيب إلى حد ما ,أحب القيادة,اجتماعي بس غشيم ,عنيد,بحب أكلم نفسي,بحب كل شيء غريب,أو مجنون بمعنى أدق 0

بتعمل ايه في وقت فراغك؟
غالبية الوقت في القراءة والتدوين00أو الإنترنت بمعنى أدق0

السفر بالنسبة لك؟

بحبه جدا بس مش بتحصل كتير ..السلطة العائلية بقى0

الأكلة المفضلة؟
مممممممممم00عموما انا بموت في الأكل بصفة عامة ,لكن الأكلة المفضلة :الفول والطعمية والكشري وبعشق البطاطس المقلية0

الصفات اللي اخدتها من بابا؟
ابويا خدت منه كتير خاصة العقلانية والتنظيم في التفكير والفلفسةوالعصبية والعند0

الصفات اللي خدتها من ماما؟
العفو عند المقدرة ,والعصبية برضه,أسلوب النصح الدائم,بعرف ارفع حاجب واحد بس ومقدرش ارفع التاني لوحده حلوة دي,الإيثار,حب الناس كلهم, كتير كتير خدت كتير من أبويا وأمي00عموما انا اعتبر أكتر واحد في العيلة واخد من ابويا وأمي,اعتبر هجين مابينهم 0

أكتر 6حاجات بتكرها؟

الظلم0

التسلط0
نمطية التفكير0
السلبية وخاصة كلمة :(وأنا مالي)0
الأفلام العربي 0
من يدعون الفكر والثقافة وهم تور الله في برسيمه0
حياتي0

اكتر 6 حاجات بحبها؟
مصر 0
نفسي

العيلة0
المدونين0
الهدوء0
الدنيا0

الشغل بالنسبة لك ؟
حاجة لسة معرفش عنها حاجة بس نفسي ابقى كويس فيها0

ايه الكمبيوتر والنت بالنسبة لك؟
حيااااااااااااااااااااااتي الحقيقية اللي أنا بحبها يمكن عشان انا في عالم الواقع 00ميت0
أباصيه لمييين؟

محمد المصري-من مفكرة حالم0

مريم-DAYLIGHT

بيجاسوس المصري0

عيون ضيقة0

بيكا روبابيكيا0

يا مراكبي-بس انا حاسس إنه عملها..مش عارف بقى-0

و أي حد عايزها ياخدها..ببلاش اهه0

تحديث:الدكتور الظريف أجل العملية تاني..خلاها يوم الأربع بقاله شهر بيأجل فيها..أقول ايه بس,إن شاء الله ابويا حيروح اسكندرية يوم الأربع عشان العملية..ربنا يشفيه0