التاج الجميل ده وصلي من المدونين الرائعين جدا:غالية-بكره أكيد أحلى-و استاذنا عازف الناي0
قالوا لك اختار عصر من عصور مصر علشان تعيش فيه تختار أى عصر وفى عهد أى حاكم .. واشمعنى ؟
مش لما ازهق من الحاضر ابقى افكر في الماضي؟..مالماضي كمان كان مليان مصايب..و بعدين أنا في الحاضر بتاعي ببني الماضي بتاع المستقبل..لما اخلص ابني الماضي بتاعي بقى ابقى افكر حعيش في انهو زمن لو اتيح لي الخيار00و اعتقد ساعتها كنت حختار الزمن اللي أنا عايش فيه ده برضه ..بدايتها كده بالسؤال الغريب ده..استغفر الله!!!0
------------
أول أولوية فى حياتك عيلتك ولا شغلك ولا اصحابك ؟
بصراحة..مش عارف,أنا لسة مش بشتغل و عموما حتى الآن متحطيتش في موقف زي ده عشان اقرر..واعتقد حتى لو اتحطيت فيه..مش حعرف!!0
-------------
ايه أكتر حاجة بتحبها فى رمضان ؟
الجو الرمضاني كله..بس لما احس بيه بقى.. آخر مرة حسيت بيه كنت في تالتة اعدادي تقريبا0
--------------
أوصف أجمل فطار ممكن تفطره ؟
محصلتش قبل كده..بس تقدرو تقولو ساعة مالعيلة الكبيرة كلها تتجمع كده وهيا بتحب بعض بجد..مش حب بالكلام كده وخلاص..ناكل ونحلي ونشرب الشاي ونتسامر ونصلي التروايح في اكبر جامع قريب..هوا ده رمضان في مصر..أو ما يفترض أن يكون عليه رمضان0
---------------
لو انت حاكم على مجموعة من الأفراد حتكون عادل ؟ طب حتتأكد أزاى انك حاكم عادل ؟؟
هوا طبعا ححاول ابقى عادل..بس حبقى أو لا ..دي عند علم ربنا ..حتأكد لما احس بكده..أصل العدل ده احساس برضه مش مجرد حقوق و أحكام..لما ضميري يستريح ححس إني عدلت..مش كده ولا ايييييه؟
-----------------
ايه اللى بيبوظ الحكام ..نفسهم ؟ ولا الشعب ؟ ولا الحاشية المقربة ؟
النفس بطبعا فيها جزء أمار بالسوء..كبر أو صغر ده شغل جهاد النفس بقى..يبقى أكيد اللي بيبوظ الحكام الإتنين التانيين,شعب بلا نظام ولا يريد النظام ,وحاشية فرحانة بشعب بالشكل ده,حتى لو الحاكم محترم ممكن يبوظ بالشكل ده0
-----------------
قريت ديوان عمر مصطفى صاحب بلوج "أسباب وجيهة للفرح" عن دار ملامح ولا لسة ؟
مين عمر مصطفى؟
-----------------
لو ممكن تشتغل شغلانة تانية كنت تتمنى تبقى ايه ؟؟
يعني أنا كنت بشتغل أولاني عشان اشتغل تاني؟..أنا لسة طالب..نفسي اشتغل كاتب ..ده الأساس,لو منفعش ابقى اشتغل دكتور أمراض نفسية وعصبية طبعا..معتقدش فيه شغلانة تانية0
-------------------
ايه تانى بلد تتمنى تعيش فيها بعد مصر ؟؟
سوريا ..حواريها وأسواقها القديمة على الأخص0
-------------------
اوصف ترتيبات اجمل فرح ممكن تحضره ؟
زي أي فرح ممكن احضره بس حوطي صوت الديجي شوية..بيرعبني الصوت ده وبكرهه أوي..مصرين يجيبولنا صمم..إنما أحسن حتت بحبها في الأفراح لما العريس والعروسة يرقصو على موسيقى هادية..و لحظة كتب الكتاب طبعا و طبعا برضه فرح من غير كاميرا في ايدي يبقى مش فرح0
-------------------
بتراعى كلام الناس والقيل والقال ؟؟ ولو اه او لا قول ليه ؟
طبعا برعى كلام الناس..عشان اعرف لو فيا حاجة غلط-وأنا طبعا فيا حاجات كتيييير غلط-أحاول اصلحها..مش معنى كده إني بغير شخصيتي كل شوية عشان تعجب الناس..الغلط غلط والصح صح..الواحد بيبقى محتاج اللي يفكره بس0
--------------------
صحيت من النوم ملقتش الموبايل ولا الكمبيوتر ولا الكاميرا الديجيتال ورجعنا لعصر الحمام الزاجل والحصنة هتكون سعيد ؟
هكون سعيييد؟؟؟..حموت طبعا0
------------------
السعادة هى ..؟
نظرة احترام من واحد عرفت تسعده0
-----------------
عندك أمل ؟ اسبابك ؟
طبعا..لإن الواقع-أو القدر- بيقول كده ..الأمل ده من ملزمات وجود الحياة..انت مقريتش تاريخ ولا ايه؟..الناس بقى اللي معندهاش أمل دي تروح تنتحر أحسن..عشان بيبوظو الدنيا اللي بيدعو انهم عايزين يصلحوها0
-------------------
لما بتحب تهرب من كل شئ بتروح فين ؟؟
بروح لنفسي اتكلم معاها شوية..و يمكن عشان أنا بهرب في أوقات كتير تلاقوني كده بسرح كتيير أوي..بعد ماتكلم طبعا مع نفسي لازم اسجل الحوار ده في الورقة عشان اكتبه بعد كده في المدونة..هوا فيه أحسن من فش الغليل في المدونة؟
-------------------
امتى اول مرة خدت فيها نفس طويل وقلت ياااه انا فعلا كبرت؟
نفس طويل مين؟ ده أنا لو خدته نفسي ينقطع..هوا أنا لسة قلت يا هادي؟..دول 17 سنة لا قلو ولا زادو..يبقى كبير ازاي؟
-------------------
اما بتعمل عمل خير بيكون ايه هو دافعك الاول ؟
يتغفرلي بعض من ذنوبي السودة0
-------------------
بتشرب سجاير ؟؟ وايه شعورك اما ست او راجل بيشرب سجاير ؟ ليه؟
لا مبشربش..بس نفسي اشرب فعلا..ساعات من الهم الواحد بيبقى عايز يفش غله في حاجة..فبيفكر في السجاير..خاطر سريع بيروح بسرعة..و أحيانا بيبقى مجرد فضول مراهقة..خاطر سريع بيروح بسرعة برضه..بس ماستبعدش إني اشرب سجاير لما أكبر..لإن كل حاجة ممكنة..مش كده؟
همممم..ست تشرب سجاير؟..مش شايف فيه تناقض؟
-----------------
بتعرف ايدك اليمين من الشمال ازاى ؟؟
بسأل الناس..بتكلم بجد..عشان أنا كل حياتي ماشية بإيدي الشمال بتلخبط في الإتجاهات جامد أوي..ساعات بسأل الناس واستحمل نظراتهم الغريبة وساعات بقعد كم ثانية كده افكر و بعدين اقرر00عادي يعني0
--------------------
ايه اكتر الة موسيقية بتحبها ؟
كل الآلات الوترية وطبعا طبعا أكتر حاجة بحبها أوي أوي الكمان-الكمنجة يعني-و البيانو..أنا معرفش اكتب بمزاج غير لما اسمعلهم موسيقى حزينة0
---------------------
فى رأيك ليه الذوق والنخوة اتعدموا ؟
ليه مين ؟..مين عم المكتئب اللي قال إنهم اتعدمو؟..يروح يتعالج عند دكتور نفساني أحسن..أو يستناني لما اكبر واتخصص وييجي عندي0
---------------------
ايه الحاجة اللى لو حصلت لك حتبقى سعيد اوى ؟
امسك أول قصة كتبتها بإيدي لما تتنشر0
---------------------
تحب يبقى عندك ارض زراعية ولااجنس عربيات ولاكام عمارة ولافلوس فى البنك؟
احب ابقى مرتاح البال0
------------------
البحر ولا النيل ؟
النيل طبعا..عشان تقدر تحتويه كده لما تقف قدامه..البحر كبير أوي وبيحسسك بالحيرة..وده مش شعور حلو طبعا..و ده لا يمنع إن البحر رائع فعلا0
-----------------
مركب ولا طيارة ؟
طيارة0
-----------------
مجنون ولا عاقل ؟
أمي بتقول إني مجنون و عقلي أصغر من سني..أصلي ساعات بحب استهبل..وفيه ناس بتقول عقلي أكبر من سني..ساعات ساعات حسب مزاجي والحالة النفسية..أصلي راجل مزجنجي!!0
-----------------
تقرا كتاب ولا تتفرج عليه فيلم ؟
الإتنين0
-----------------
أكتر صحفي بتحترمه في مصر؟
وائل الإبراشي0
تمرر التاج ده لمين ؟
تلاقي المدونين كلهم خدوه ..ده أنا مجاوب متأخر أوي بس اعتقد دول مخدهوش
مريمDAYLIGHT
مسلمة-طي النسيان
طنطاوي-مصرنا
ابن خالتي العزيز محمود سعيد-لماذا أنا؟
محمد مفيد-في الصميم
عيون ضيقة
واحدة من الناس-همسات دافئة
نور-ظل قلم......بس!!0
مع تحياتي00
والسلام عليكم0
هناك ١٥ تعليقًا:
:)
اجاباتك جميلة ماشاء الله
هههههه ايه موضوع اللخبطة بتاعة الشمال دي
و بعدين ايه ده مش عجبك اي عصر تعيش فيه
عصر الملك مينا طيب
:D
ممممممممممم
أولا ميرسى ياعم انك فاكرنى وان شاء الله اجاوبه
ثانيا بقى: ايك تشرب السجاير دى
نفسك؟
داانت يومك زى شعرك بالظبط
كن رجلا
اسم بلوجك اللى بتمنى انك تكونه بالمقاييس الصح
مش بالسجاير
ويارب تشتغل بقى علشان كده ضاع منك سؤالين ياعم
سلام بقى
اجاباتك لذيذه وليها معني
إن شاء الله تعرف اليمين من الشمال كويس لما تمسك بيها أول قصة منشورة لك
بس برضه معجبتنيش إجابتك على موضوع الفرح والسجاير والباقي جميل جدا
���� ���� �� ������
��� ������ ������
��� �����
ما شاء الله
اجابتك حاسه فيها بثقه فى النفس
تحياتى
مدونة ظريفة وطريفة
سأزورها باستمرار لاقرأ جديدك
لمحبي الكاريكاتور مدونة كاريكاتور العرب:
arabcaricature.blogspot.com
الى صديقى العزيز أحمد المصرى , إجاباتك توحى بعقل ناضج وخلفية متفتحة , وبما إنى زيك فى حكاية الشمال بس الفرق إنى اتعودت عالموضوع ده من أكتر من عشر سنين , فأتمنى لك التعود السريع , تحياتى لك وياريت تبقى تشرحلى موضوع التاج أجيبه ازاى عندى, كل سنة وانت طيب
ابيتاف:
منورة بعد طول غياب..شفتي بقى امثالنا بيعانو ازاي من الإتجاهات؟..لا يا ستي مينا مين مش عايز اقعد اشيل في احجار بقى واحارب الوجه البحري والحاجات دي..بس لو لازم لازم ممكن اعيش في عصر خوفو..اللي بنى هرم خفرع
------------
عين ضيقة:
لا شكر على واجب..ياااه ده انتي مرفوع عنك الحجاب..عرفتي منين إن شعري اسود؟
مين قال إن السجاير مقياس رجولة..أنا مقلتش كده ..أنا بس لما اشوف واحد بيشرب سجاير ببقى عايز اعرف بيحس بإيه إنما عمري ما حشرب سجاير طبعا..عارفة يمكن الشعور ده خاطئ بس الرغبة في التجربة مش شعور بسيط ..الواحد ساعات بحيب يجرب حاجات حتى لو عارف إنها غلط لمجرد التجربة..ده مش معناه إن ده صح طبعا..و لما قلت في الآخر إن ممكن لما اكبر اشرب..لإني سبت الموضوع للقدر ..ولما تسيبه للقدر محدش عارف ايه اللي حيحصل حتى لو كنت اعبد الناس..انما انا مش بفكر في السجاير خالص ولا هماني..لحظات خاطفة زي ماقلت..
و اعتقد إن السجاير لا تقدح في الرجولة زي ما بيقدح فيها إني اتسال سؤال واجاوب باجابة تقليدية من ورا قلبي ..عدم الصراحة بتقلل من الرجولة اكتر من كده..اقتنعتي ولا شايفاني بهرب ؟
-------------
كوكا:
ب مكلتيش ليه؟..خسارة..شكرا عالزيارة الكريمة0
-------------
عصفور المدينة:
ياااه بقالي كتير اوي مشفتش اسمك منور هنا..معاك طبعا في موضوع السجاير ده ليك حق تزعل والله..بس زي ماقلت..الصراحة ليها واجباتها..بس بتاعة الفرح دي فيها ايه غلط؟..علمني اكون غلطان هنا كمان0
--------------
ابو مفراح:
طبعا طبعا..بس أنا مش عارف انت كاتب ايه؟..لو سمحت اكتبه تاني لو تكرمت عشان مش باينة الحروف00ومنور0
--------------
قطة الصحراء:
ثقة في النفس؟يا سلااام..دلوقتي اتاكدت إن احساسك عالي ..ههههه لا شكرا عالتشجيع بس عايز اسألك بس..القطة الأمورة دي جبتيها منين؟
---------------
الرشيد:
يا راجل بقى بتمدح عشان اخش مدونتك..طب مش خاشش..بهزرررر اوعك تزعل لحسن الناس بتزعل مني كتييير اليومين دول
منور و شكرا0
---------------
لماذا أنا:
حبيب هارتي..يا عم خد التاج عندك جاوب على الأسئلة في موضوع أو بوست لوحده..والناس اللي عايزهم يا خدو التاج اكتب اسمهم تحت الموضوع..ناس مدونين طبعا...أي خدمة؟
-----------------
مع تحياتي00
والسلام عليكم0
الف حمد الله على السلامه
نزرت المدونات
و لا يهمك المهم تكون الظروف عدت على خير
معلش انا كمان من مده كده مش متابعه قوى و وقتى ملخبط
بس ايه الأجابات الجامده دى
بس فعلا مفيش اى عصر طيب جرب فرعونى يمكن يعجبك
شكرا على التاج و هجاوبه قريب ان شاء الله
ايه يا عم الاجابات اللذيذة دى
تحياتى ليك
التاج ده شكله كده مقرر على المدونين كلهم بعد العيد
عموما إنت نجحت في المقرر .. قصدي التاج
:-D
نظرا لتميز مدونتك تمت أضافتها لدليل الصباغ للمدونات
===============================
شاركنا الشعب الأمريكى أحزانه على ضحاياه فى ذكريات سبتمبر/أيلول الأليمة
لكن دعونا نُذّكر العالم بالجرائم الأمريكية التى أرتكبتها الولايات المتحدة ضد أبرياء وأطفال ومدنين
شارك وأدعم فكرة تخصيص يوم 30 أكتوبر يوما للجرائم الأمريكية
أحمد الصباغ
مريم:
ده انتي اللي منورة..يا ستي ربنا يفرجلك وقتك إن شاء الله..مش حكاية مش عاجبني عصر معين..كل عصور مصر جميلة جدا من أول الفراعنة مرورا بالدولة الروماني والقبطية والإسلامية..بس حاسس إني مش حقدر اعيش في أي واحد أو أي واحد فيهم مش ماشي معايا0
-----------
أحمد الصباغ:
من بعض ما عندكم0
-----------
يا مراكبي:
حاجة زي كده..والله؟..طب كوي كنت خايف اقط ولا حاجة بعد سؤال السجاير ده..ههههه..منرو مدونتي من تاني0
-----------
أحمد الصباغ:
تعليقيت مرة واحدة..شكرا ياعم على الإضافة لدليلك الجميل بالتأكيد0
-----------
مع تحياتي 00
و السلام عليكم0
بسم الله
الحقيقة أعجبنى للغاية عنوان مدونتك والعبارة المكتوبة عليه. واعجبتنى محتويات المدونة التى اطلعت عليهاحتى الآن. والأكثر عندما اطلعت على ملفك الشخصى.. فلقد أكدت لى -ما أنا على يقين منه- أن هذا البلد ما زال فيه رجال بحق.
وفرحت للغاية أنك تحب الكتابة وتنوى التخصص فى الطب النفسى.. فقد ذكرتنى بالدكتور عادل صادق رحمه الله... فربنا يبارك فيك وتحقق ما حققه وأكثر إن شاء الله :)
عذرا للإطالة!!
إرسال تعليق